Bukedea; Airaban nako Uganda Anita Annet Among korai abwoikiniton naka angor kodistrikita loko Bukedea ngesi abu italaka itunga lu adeparete 120,000 ijaiki kangin idiopet kakesi isirigin 20,000.
Among ngesi Abu iswamaik Ikidia nu eraasi 23/12/2023 kotoma asuban nu ajaikina toma alaro baka edistrikita loki Bukedea kanu itunga aimala ngesi kanu lokasuban aijakin ngesi aidoun ikedwe imwatok kotoma apatan.
Grace Akiror aminista na eipitene kajakanut naka Iteso Cultural Union( ICU) ngesi abala ebe apotu kesi eraasi 22/12/2023 italata ber etaun loko Bukedea naarai kotoma oipitene loka Iteso ejai duc aitemonokin ere eroko ipejok kepona.
Ziporah Akol Ocom aigangiton ke Among kotoma aijanakin ke kwape MP ngesi abala adaunit Among apak na eoja mam iriamuna ka aseak ke, Ido apotu itunga itodutu Amina kec mama ejai apwakunan atukot naka Anita foundation na iswamae akiro nu eposik ko Bukedea.
“Kanu aitodun aiyalamakec itunga apotu ibwokokisi Anita iboro swi anyoun osujoi,akokorei akinei toni aituk.
Sam Engole LC3 loko Bukedea TC ngesi abala kwape araar airaban Among na emunit idwe lusa apotu kesi kwape lu Bukedea TC ijaikisi ngesi akineina emunit ikaalei iyarei lu eraasi ikorwa.
Among alopet abu ilip itunga site nu apolon kaimorikikina kanu apolon.
Kwape araar aparan na aiyalama igurupun aramak kere aponi ijanakinai ainanakineta anyoun osirigin 2,000,000 losodit, 1,500,000 loiyareit, 1,000,000lo eunikini losodit lucie kere aramak kere 500,000.
Wilberforce Tukei RDC lo Bukedea abala akoto itunga apaikin esiokina neejai Anita kwape aingarenon kec namam ebeit aijulkanu iswamae ngesi.
Mary Akol LC5 na Bukedea Abu ituroto lokasuban kanu aijakin kesi apesr na ekajaki Bukedea amaapu naarai abu odaka enaaba losodit kwape airaban karii nako Okide
“Anita na itete yes erai aberu na ilamara acobei tapi epedori atukun eirabak lu akwap kere lu akwapin nukolo epugat Bulaya”,abala Akol.
Konye Apolok lu ikaru 70 kuju kesi akadakitos naarai mam apotu imedautu kotoma apiyai nu Akorimo kanu ebaga.
John Okello kojena kwape Ocicina olumunite ka Nyakoi kotem Kamutur abala mam kesi apedorete alosit Bukedea, Ido ebe akoto ti LCs ijaikitai epelu lo aijoliliun Apolok ka amakio.
” Erai Anita apesr na ejok ngesi ajaar eong opurake noi alopet da ejeni”, abala Okello.
Ateker Newspaper
Oraun Eiwadikan
Ijo irai eiwadikan lo ajokan ido ipuda aiwadika iyemuto kanu Ateker Newspaper. Karai irai ijo ageunan arai mam i jaunit isio ijo toma okale lo Ateker lo da epoloi akuwar keda aparan koteso.
Ijuk iyemuto kon kitosomai imail = iyemuto@atekerwok.com
- Kanu acie agangat kinom esiimu= 0394814512/0777257521
