Lo erai apolon eicolong loka NRM ko Pallisa George Oule Omoding ngesi eroko atorob itutumae anyoun koleje na iwongonet eraasi 07 Okwang 2024 aparan na eitoritor Pallisa aijanakin na ikaru 38 lu adau NRM oicolong.
Oule lo aponi isiepokinai awai kotoma oineresinei ngesi abala ebe elomunitos nu kere kanu eipud ke aibwo aigogolor Patrick Duchu iwala ekaru 2026 kwape LC5 lo Pallisa.
Kotoma apopula na egirakitai einerak arai Oule kwape apolon eicolong loka NRM abeit einer akaulo apolon eicolong LC3 lo Pallisa town council eroko Duchu elomara alaro konye aponi ilami.
Akaulo Duchu einer Abu ilip Magidu Dhikusoka lo erai RDC acakakin Oule apak eroko MPs itinga arupepe.
Ekubokin Oule arupepe abu itorio itunga aiwadikaete nu ebe emikitotor Iparisayon Yesu Kristo einer kobala ebe erai apeleikinet na aisimik ngesi einer kanu alimorike abwa.
‘Konye eraI ekotoi arai mam ejaun eong aibwo kaitub kwape efaif idarekisi 2026. Kwape ekuristayot etim eong kesi konye kotoma aseo mam yen etimi eong cut”, abala Oule.
Oule Abu olimok RDC aisac alomar noi toma akiro nu Pallisa naarai ebe enyouni moi inyeikini kesi obukec. Dr. Kenneth Ongalo Obote eminista lo akiro kanu Teso lo erai epejonon lo angosibib ecopi einerike abala akoto ngesi Oule inyikok ecelet cut tetere aolanet edaun, ecie esawa ejok ecelet korono bobo da.
” Oule akoto eong acamuni akon akiro nu aitim kwape nu elomunitos kotau mere aituk naarai kwape NRM ekot ajaasi ka atiting. Ido bobo akoto atemar ebe arai arwakanet na akonye kama ajaasi eitekerak program “, abala Ongalo.
Ongalo abala amamus aimor akiro nesi eyauni amamus apol, aomit eong ngesi ejatatar ican ne noi epol itunga engunget.
Konye Duchu kwape lo ikila Oule aikongor omakuk abala mam ngesi ajai toma akiro nu agolor Oule. ” Korai kereka abeit mam Oule etukuriani eong arai caat icie, elanyani eong Oule komam akuriana inyeik editor opucit lo ajokis ejaasi aseak icaloi itupari ngina “abala Duchu.
RDC Dhikusoka abala ebe arai adiakaret konye mam ajok aresianar akonye ipejok. ” Bobo da Abu eong ejaik ngesi einer apak ka ne abunio itolosio epeluke ejok aitodiar apolok icolongo lu itemwan”, abala Dhikusoka
MP lo Kibale Richard Oseku abu ilip eingarenok lu Pallisa alemar atiakatiaka naarai emamei ne eyangari ateker. “Ibore akotor eong oni ecelet nesi apegun iboro lu ingarakinete itungawok mere kanu asesen ipudesia ka aisingarenit ipudesia wok”, Oseku abala.
Ateker Newspaper
Oraun Eiwadikan
Ijo irai eiwadikan lo ajokan ido ipuda aiwadika iyemuto kanu Ateker Newspaper. Karai irai ijo ageunan arai mam i jaunit isio ijo toma okale lo Ateker lo da epoloi akuwar keda aparan koteso.
Ijuk iyemuto kon kitosomai imail = iyemuto@atekerwok.com
- Kanu acie agangat kinom esiimu= 0394814512/0777257521
