Pallisa: Eingarenok luko Pallisa kesi kana iwongonet kosabiti lo atubor apotu ikamutu arereng ailepanakin Dr. Kenneth Ongalo Obote eminista lo akiro kanu Teso atiokuso nu eridakitos edistrikita kec kowai lo eijanakine.
Nu kesi eswanasi alaro nako Busitema university ne eitoritere ikaru 38 lu adau NRM idelo omakuk ingarenikite President Yoweri Museveni.
Richard Oseku Oriebo MP lo obuku loko Kibale ngesi Abu okudian kanu ibore mam ekotore aikeuna adekis na Pallisa kotaun referral tetere itunga eyuunos kotoma aimukeo kobalasan adekis nako Mbale.
Oseku abala ejai Pallisa irigaunitos idistrikitan iwongon lu imoriaritos Budaka, Kibuku, Butebo ka Pallisa alopet lu ejatatar adekak lu ikilasi aingarakinio na epol, ibore epol ikeunai adekis na naarai edukitai kolo 1966 kanu adekak 100 konye kwapekwana ileleba noi.
” Edolit Pallisa town council kwana itaraunai municipal kwape elayata kwana irotin, kojatatar iboro kere lu ipudai kosodi ekot erionget lo ikisila aijaikin adieket na Pallisa amotoka naarai toma amamus na elose itunga aridakitai aitolot atubok ,iridakitai sio kwape eingarenok luka Pallisa kanu mam aingaranakin itunga adumun aituk nu kolo eruruorio. Bobo da ekotosi itunga lu Pallisa odutakinai eminista mere aite imisitan ipialalaete okolas arasit Teso ka Lango bon’, abala Oseku.
Kwape araar aparan naka NRM, Polycarp Ogwari MP lo Agule abala mam itunga alakara Ido osubitos akokorei nu ecooro konye korai aparan na epucit ibore ijai ibore itikadikit itunga.
Ogwari abala ekoto itunga aibumakin opate loka NRM, abu iyatak ebe ationis nako Pallisa ejaasi lu ekeuna kotoma NRM itibusitos lokec bon.
“Epol NRM adepar oni kere ,ido emamei yen ejai kuju naka epate eminasi itunga einer ebe NRM nesi Museveni ido Museveni ngesi NRM , Mam erai kwangin NRM nesi oni ido Museveni ngesi eingarenon loka epate wok”, abala Ogwari.
LC5 Patrick Duchu abu ikenyak eminista loko Teso ebe araida iyalama akwap kanu iswamae NRM mam cut elakara naarai apalu apugan aimony kec kacut kowai lo asioman naarai amamus na esisiakinak 700 lu ipudai edistrikita nesi ijaikit Pallisa erai idiopet kotoma lu awasia ko PLE.
Losek arai MP lo Pallisa Jacob Richards Opolot ngesi Abu italaka itunga kelimu ebe ejari ngesi ,Ido ejaun abolia akutakin epirigi konye ebe lu ejaasi oyapesin ijanakisi itunga.
Dr. Ongalo ijaikini einer ke abala ebe kanu Pallisa araun municipal akoto ber itunga aitojokar aduketa mere not kolo ilugai, kanu airuk esisiakinak, adekis ka adieketa Abu olimok eingarenok aijesun aiwadikaeta ayangar oyapesike fo kesi alosit aikungukung iriongeta lu ikamutikos akiro ngun kere.
Ongalo Abu ikenyak Iparisa erai ekotosi adumun eminista kec lo Pallisa akoto aisac aijulujul MPs.
” Ibore ijaikit yesi icanasi ko Pallisa nesi agwelanar alupok kanu imusagono lu epedoria itunganan adaun ilapio idis iyarei arai iuni”, abala Ongalo.
Kanu apugan abala ebe araida edaunit NRM ikaru 38 konye 20 lu egeete toni 2006 arai lu angingau apuconor ko uganda.
” Kwana itolosi NRM ipirin iwongon lu imoriaritos Amina akwap wok uganda, Africa, demokrasia kaaitokojar akerianut “, abala Ongalo.
Ongalo abala esisiau ngesi ebe mam itunga lu imedaunitos kotoma PDM ijanakitai isirigin emiliom ediopet ka abeitor naarai icie apotu olimokisi ngesi ebe ijanakitai kesi shs.980,000 mere shs.1,000,000.
“Ekoto eong RDC ka eswamak lo oyapesi lo agwelanar alosit aingadisia ijaikinai itunga lu isirigin kere naarai eraasi lu apesen ,ido Apugan alosi aitac aingadisia igaraman kere”, abala Ongalo.
Ateker Newspaper
Oraun Eiwadikan
Ijo irai eiwadikan lo ajokan ido ipuda aiwadika iyemuto kanu Ateker Newspaper. Karai irai ijo ageunan arai mam i jaunit isio ijo toma okale lo Ateker lo da epoloi akuwar keda aparan koteso.
Ijuk iyemuto kon kitosomai imail = iyemuto@atekerwok.com
- Kanu acie agangat kinom esiimu= 0394814512/0777257521
