Atubok iuni lupetiok adieket na ijulilaerere imusagono nesi kotoma otube kec lo apesikinete eraasi 19/03/2024 apotu ocakutu Polycarp Ogwari lolem arai MP lo obuku Agule kinga na airabet.
Ogwari elopet ejulirat emusago lo kegir etube lo 12/12/2022 etolomunit atubon Moses Kazibwe Kawumi kadieket nako Mbale ne eyangarit David Ochwa angurian ne ebe akokotere aseo , aibunga itunga ka ebe ailocokina na apopulai ke Ogwari lo adumunit 7,190 kosodi Ochwa atukokin 6,908.
Konye eraasi 12/12/2022 adieket abu kolekunite Ogwari kobala itemonok erionget loka aseo ainapeta nu abongokin aseo konye Ogwari abu itojoka aimwang etube ngol kosodi epidipid Kampala aijulira etube kobala iwadikauna ngesi ka eseunio da kwape ejaar okilisa.
Erionget loka aseo nesi ebe abu ogwetar awai komusago kalo ewanyutu acukulen nu apotu kesi itolomutu.
Kosabiti kalo eraasi 19 Okwang 2024 atubok iuni Eva Luswata, Martin Stephen Engonda ka Oscar Kahika kesi apotu iwelutu etube kec neda aponiata obilarata abongokin na aseo kosodete aitojokar Ochwa airas airabet kwape MP loko obuku Agule.
Apotu icorakisi Ogwari aijal ipeleike kwape MP ka aikopar iswamasia, erionget loka aseo ka airaban Annet Anita Among aitemokin nu aisilair Ochwa katipet.
Konye Ochwa inerasi ka Ateker abala ekoto itunga kere lu Agule ainapakin kadumun etube, ido ebe alosit ngesi aibumakin itunga kere kanu apol.
” Akoto aisiyalamikin NRM pate, adieket ka itunga lu apotu ocamutu aibwo keda eong komusago kalo araida onaceka Ogwari inapakin , mam akoto ngesi aiyong adolonokin eong naarai ikoto kere aikeun agule”,abala Ochwa.
Egangiton Ochwa kwape nat Yoweri Tukei ngesi abala akoto kwana MP loitetet arapakin aisogon nu kanu aitodun aswam ke.
” Emamei ti ajokis na aipo epucit da konye naarai ekotosi itunga aibworar itamatarai akipi kenyeikisi adodanar”,abala Tukei.
Adumun nu aituk Ogwari nesi abu otionor naarai alwanikina osimu.
Konye Yusuf Edekasi aiyaton lem ainapeta Ogwari obuku lo Agule abala kwape ijaar apakio nu ailing ailip Allah ijaik agogong mere aikedianyikin aomisio .
” Nu alomutu kesi ngun konye eraasi itunga ikany abwoitos arai ti anongokin aseo konye kwape mam okilisa itirianitere otunga apotu atubok osubata bala arai itunga koleje Gogonyo aponi abore inyakunai ocaalo”,abala Edakasi.
Ateker Newspaper
Oraun Eiwadikan
Ijo irai eiwadikan lo ajokan ido ipuda aiwadika iyemuto kanu Ateker Newspaper. Karai irai ijo ageunan arai mam i jaunit isio ijo toma okale lo Ateker lo da epoloi akuwar keda aparan koteso.
Ijuk iyemuto kon kitosomai imail = iyemuto@atekerwok.com
- Kanu acie agangat kinom esiimu= 0394814512/0777257521
