Atukot namam iswamae emeda korai naepwakunitos isaa lukotem Kamuge kodistrikita loko Pallisa lu etoritos ocam kotoma asioman kec kesi engarakisi idwe 20 luicogoror ejautene cut olosite asioman ageun onasare toni atukot na P3
Ignatius Egolet arucokiniton atukot na abala egeunitos kesi kanukec aanyun ebe idwe lu emamei ejautene ingarakinio.
Egolet keda etimuke kesi apotu okorakisi idwe lu kangin idiopet itabon 10 kedaikalamun.
” Ipodokit sio asioman naarai Kamuge ngesi etem ediope ko Pallisa mam idwe engetanakinata araida puraimare , ido apesur elelebata itatai okalia naarai eremokin edukone ipiko kwape edisiar kobonguni ore odumuni bobo icie “abala Egolet.
Egolet abala mam akoto imodio itunganan arucokin atukot kec keda politics.
” Iyalama noi ne ejai apugan kanu UPE konye naarai apasata alupok mam itosomaete ikorion ejok mam epedoritos aswam ipeleik kec lu idwe ainyam kosomero,agwelakin anapito, itabon tapi kesi ilipitoslu ojokotau aibumakin ka kesi”, amonyi Egolet
Zimba education ministries ngesi man itei asioman bon konye isisianakite itunga ejautene loka ekuselo ikwamin ka aijulakin itunga aomowon aipit iboro lu elemunete kesi kotoma obakor.
Simon Peter Olupot atupiton apolon eicolong LC1 lo Onamudian abala icie itunga lu ejaasi ejok epote aite ayangar na Zimba education ministries abala aboliak konye sio iseseni kwape ibore yen agogong naarai aijakin ikoku kon itabon lu 10,000 erai alakara noi.
Olupot abala itunga kesi amonyetr ayangar iyatakinai.
Stephen Arikod eicokon lo okanisa lo Apostolic church Onamudian abala ejok atukot na Zimba education ministries naarai isingarenitos Edeke akiro kere.
Mary Amongin na idari ikoku yen abu akooke na iswamae Kampala iraru ecakaritai losodit polis aisikamikin ngesi aitopoloun abala akoto agangat kodolok kangin ekale.
Stephen Opela Eimanimanan loka isomeroi ko Pallisa isinyikokit atukot kotoma aipecitoi kec asisianakin Auriak ipeleik kec araida egeunitos kesi aigang idwe.
Opela elipit auriak mere apaikin esesenete Zimba education ministries bon naarai eyangari ber idwe idis bon
” Ikoro aanyun ebe eraasi 5/02/2024 elosete idwe kere isomeroi asioman cut. Ageun osabiti lo akoto Apolok isomeroi kogeutu aswam keda aanyun ebe idwe edumakinio inaabin lu LIN”, abala Opela.
Ateker Newspaper
Oraun Eiwadikan
Ijo irai eiwadikan lo ajokan ido ipuda aiwadika iyemuto kanu Ateker Newspaper. Karai irai ijo ageunan arai mam i jaunit isio ijo toma okale lo Ateker lo da epoloi akuwar keda aparan koteso.
Ijuk iyemuto kon kitosomai imail = iyemuto@atekerwok.com
- Kanu acie agangat kinom esiimu= 0394814512/0777257521
