Na Lawrence Okwakol
Itunga luko Pallisa kacut aramak, ikuristayon lu eraasi igeresan nepepe kalu lem eminasi aram ke Ben Opule kojenara noi kwape Maka kesi eroko aisorit na etidot lo atwanareke iswaiswai.
Kotoma okanisan loko St. Luke COU Akisim nelem ilipia Maka araida erai lem lo apolokit awoere ka aibit ikososinei lu ediini kotoma awanyanaret kere nako Bukedi eyuunak esubitos bala ejai ber ne alosit Maka aijanakin.
Maka lo ikaru 40 ouritete Ocala kalo Ometai kotem Akisim ngesi abu eigworoke otukok itunga lu adeparete 6000 tapi icolongo 3000 luebwaikit ekomiti loetolosi ainapeta nu anukio ingarenikite David Apuwa omamun ajokis naarai apotu osubata aitonakinet na akipi angolol.
Chris Angito lo apolokit atukio naka agangat kotunga lu iboete kinga na Pallisa ngesi abala araida idaitai Maka olap lo Opolokolokai 2023 esubit bala osabiti lo atubor. Itunga lu Ometai kacut lu okaleke Maka kesi apotu itodiasi aiyalama nesi ejaasi itunga lu apotu igangata kesi toni icie acamun aingarakin ikiokiok kotoma asioman.
Bishop Dr. Sam Bogere Egesa lo etolosio asuban nu ailip abala itegelikina eigworoke Maka noi tapi ngesi eyangari alimokin ke kwape atukonokin ne abunio ilipakina itunga lu apotu isiteteutu aiyuun kec ijautu Kristo kwape eitajaran kec.
Bishop Egesa abu ilip itunga lu aminasi Maka ne erokor ejari aingarakin idweke aikopar asioman kaidar, kobala ebe awanyanaret alosit aigang akooke na apolon yen elomari okaru lo S4 singer ekaru lo kere.
Itunga lu apotu olacakinos acamun aigang idwekec kangin itunganan aibe idiopet kesi imoriaritos Rev.Robin Okia, Margaret Odeet, Nasek arai MP Mariam Amoit, Stephen Omuuut edairekita lo Bright Future nursery/ primary school, Simon Okia edairekita lo Bo-Grace nursery/ primary school,ekaleke Hon Derrick Orone MP lo Gogonyo.
Konye Thomas Papakonyang lo epolokit lem ekalekec Maka kwape emusika ngesi abala alosete kesi aimor keda itunga eipone lo idarere idwelu mere ayangar komamete nutuputono.
LC3 lo Akisim Ambrose Okello ngesi kotoma oinerike abala erai lem Maka eitunganan lo inomere amaapu na otem ke. ” Ejaasi Akisim keda itunga lu apolok odakitos iyapesin lu epolokit konye mam ajenara kwape Maka. “, abala Okello.
Constantine Okwi eminista lo iyemuto ko ICU ngesi Abu ikenyak itunga ajaut ka Amina ka Aiken eipitene kec lo iteso. Okwi abala ajaut lem Maka otunga nesi ejaiki ates epu noi eigworoke.
Dan Emotai kojenara kwape King Daniel ngesi abala araida apotu kesi otukutu ayangar na 1.4m lu apotu ikopasi omeesa, apotu bobo kesi itepenikinos kosodete kwape aramak agwelakin ekale lo enyeiki oupakec akiteng ka akinei.
Rev.Charles Okiror etikewadikan lopeti kawanyanaret nako Bukedi king it bishop ibore yen ejaikinio apuserut ka ikiokiok obaga ,ngesi abu itojoka 200,000 kosodi Amoit ajaikin akokorei 10 kotoma ofaamuke.
Ebongori aitanyam itunga komoyo Papa Bishop Egesa Abu icor itunga acoit ecokok,inaabin lu engalak lu kwana esiarakinos oredion aingalibgal itunga ebe Simon apotu etogo lo ikoro ijo 2024,emotoka , Ido abwaikit abakasi ka isirigin .
“Emamei ngul aitutuoro adio kotoma Akiror naka emoyo , Elipit eong eicokok alimokin itunga aswam gogong tetere Edeke esisnakini kesi kokeriakata. Emamei eipone lo edumunetr abar ilema aswam isingarenite ailip “, abala Bishop Egesa.
Abu da ilip akainon aminarara naarai kesi akulepek apotu kocamutu aimor ekilo,aso amamei ajokis Aire akainikon na edari ekoliokit eroko ebukio togokon ibeik ijo aleya. ” Itunganan yen idarakini ijo ibore yen imina ijo ngesi Bobo itikokoli ijo? Konye arai ebeiki ngesi ekoliokit Shaun totoke eipone lo icakicakaere alaro oramete idwe aswam katipet”,etatami Bishop Bogere.
Ateker Newspaper
Oraun Eiwadikan
Ijo irai eiwadikan lo ajokan ido ipuda aiwadika iyemuto kanu Ateker Newspaper. Karai irai ijo ageunan arai mam i jaunit isio ijo toma okale lo Ateker lo da epoloi akuwar keda aparan koteso.
Ijuk iyemuto kon kitosomai imail = iyemuto@atekerwok.com
- Kanu acie agangat kinom esiimu= 0394814512/0777257521
