Na Lawrence Okwakol
Itunga lu obuku Gogonyo kodistrikita loko Pallisa kesi ecorakin aitup ayapara nalem ajaasi kesi toma apakio nu ailung ke asisiakino na ejaikino kesi okanisan kec tetere aayuun kec esipo. Lo erai MP lo Gogonyo ngesi ekeuni kokanisa loka Kachango COU ne alosit aimor ailip keda ikuristayon lu atutubet kangin.
Orone abala kotoma ainapeta nu apugan adau ngesi aibwap akiro nu isomeroi luka sinia lu kotemwan kalu Obutet ka Kaukura adau erionget lo aisisia ka aboliasio aitogogong ebe elosio aiduk. Abu itur Esaserodoti lo Chelekura Chrisostom Oduch kanu acamun ayangar ailip oyapesike atikawanyanaran Dr. Emmanuel Obbo lo Tororo arch diocese kanu esomero adukio apetetat naka atulika.
Abala ebe kowai lo etem abu ngesi ogwelak Obutet amisiri na isirigin 10m na ejai arwatat toma nakwana epataka si aijul agolaik oraasi nu iriamara ka iyapesin. Kowai lo ayuara na inyamat MP Orone abala akoto itunga scout noi naarai ebe luipu akurosi emuogo kanu aibuk amisiri kanu aira ikorion icie kacut emaido.
“Ejok aruruk idowon acakakin inyamat kwap konye aibelar emuogo ayangar togo epataka adaun naarai kangin ationis kere erai amukun koyangarete agwelar”, abala Orone. Alice Amuron eyalama noi kanu Orone aijesun aimor keda kesi tetere kewanyuni eipone lo ejaar ekanisa kec.
Amuron abala akoto ekanisa kec angetakinio kwape aponere itanyanyarere aisuk. Kwape kwana MPs kere ejaasi obukui kec aimor keda itunga kec ka ainyskanakin nu atwakata airabet ka atukun aomisio ka angurian naka itunga icaloi.
Anita Annet Among airaban nako Uganda abala ejaasi MPs aiyeng konye ageun airabet kana iyareit. ” Lu epaikitos Kampala ikulepek itojokitos kwangin mere airabet”, abala Among.
ADVERTISEMENT
Ateker Newspaper
Oraun Eiwadikan
Ijo irai eiwadikan lo ajokan ido ipuda aiwadika iyemuto kanu Ateker Newspaper. Karai irai ijo ageunan arai mam i jaunit isio ijo toma okale lo Ateker lo da epoloi akuwar keda aparan koteso.
Ijuk iyemuto kon kitosomai imail = iyemuto@atekerwok.com
- Kanu acie agangat kinom esiimu= 0394814512/0777257521
